साठु केरु कंदो

साठु केरु कंदो (संस्मरण)
                    भावन मां न रुगो पंहिंजनि पोटनि-पोटियुनि जी डाडी हुई पर, जयपुर जे आदर्श नगर
जी सजी सिंधी कॉलोनीअ जी डाडी हुई. सन्ही-डिघी-सुहिणी ज़ाहिफां, गिल गरदार, अस्सी सालनि जी उमिर में बि
सभु डंद बरकरार, नज़र तेज़ु-तिखी ऐं विशाल दिल जी मालिक. भगवान दिल खोले हुनजे हथ में शफ़ा डिनी हुई
ऐं हूअ बि दिल खोले शफ़ा विराहींदी हुई. बार-बच्चे, नंढे-वडे, बुढे-बुढीअ खे यानी कंहिंखे बि पेर में मोड़ो अचे,
चेल्हि में सूरु थिए, छिकी पए, कलियूं पवनि-भजंदो हो भावन मां वटि साठु कराइण. सुबुह-सांझीअ टे भेरा साठु
कराइणो हूंदो हो ऐं पोइ तकलीफ़ त छा तकलीफ़ जी याद बि कोन ईंदी हुई. रख चपुटीअ या तेल ज़रीअ सां अहिड़ी
तरतीब सां मालिश कंदी हुई जो थिड़ियल कल जाइ ते अची वेंदी हुई.
                      हूअं त हुनजे घर जा ऐं दिल जा दरवाज़ा सभिनी लाइ सदाईं खुलियल हूंदा हुआ पर,
सुबुह जो छहें खां अठें तांईं ऐं शाम जो पंजें खां अठें तांईं अङण में वाण जी खट ते वेठल हूंदी हुई प्रभुअ जे
प्यारनि जी आज़ियां ऐं शेवा करण लाइ. निष्काम शेवा जा भगवान हुनखे भाणा बि चङाई डिना हुआ. हुनजा बार पढ़ी- लिखी सुठी नौकरीअ ते लगल हुआ ऐं ईमानदारीअ सां पंहिंजी ज़िंदगी बसर कंदा हुआ. हुनजे घर में कंहिं बि नंढे-वडे खे डॉक्टर जो मुंहु कोन डिसणो पियो हो. सभिनी जे चेहरे ते तंदुरुस्ती ऐं संतोष जी लाली हुई. भरपूर भंडारे वारे हुन घर मां को बि खाली कोन मोटंदो हो. बारनि खे तन-मन जी शांतीअ सां गडु मिलंदो हो हथ में टॉफीअ जो तोहफ़ो ऐं साठ खां हिकु कलाकु पोइ टॉफी खाइण जी सख़्त ताकीद, जंहिंकरे बारनि में धीरजु पिणि पुख़्तो थींदो हुओ. अछे पड़े ऐं प्रिंटेड कुर्ते ते अछी चादर पाए बाहिरि निकिरंदी हुई त सभिनी खां खबरचारि पुछंदी वेंदी हुई. हुनखे पक्की यादगीरी हूंदी हुई त केरु कहिड़े साठ लाइ हुन वटि आयो हो, भली साठु कराइण वारे खां विसिरी वञे.
               नंढे हूंदें खां ई कंहिं गाल्हि जी तह में वञण जी जिज्ञासा जे करे हिक डींहुं मूं भावन मां खां पुछियो त
तव्हां खे इहा डात कीअं मिली. भावन मां खिली चयो, "पुछी छा कंदीअं?'' "थी सघे थो मां कडंहिं तव्हां ते आखाणी लिखां, तडंहिं मूखे हीअ गाल्हि बि लिखिणी पवंदी.'' मूं वराणियो. भावन मां पल-छिन में केतिरा साल पुठियां पहुची वई, चयाईं,"घणा साल अगु जी गाल्हि आ, मुंहिंजी नंईं-नंईं शादी थी हुई. मुंहिंजो सहुरो सभिनी जा साठ कंदो हो. जडंहिं बि को हुन खां साठु कराइण ईंदो हो त मां ध्यान सां डिसंदी हुअसि. मूंखे बाबाजनि जी इहा निष्काम शेवा डाढी सुठी लगंदी हुई. खास करे जडंहिं बि को रुअंदो-रुअंदो ईंदो हो ऐं खिलंदो-खिलंदो वेंदो हो, मुंहिंजे मन खे अजीब सुकून मिलंदो हो. बाबाजनि इहा गाल्हि ताड़े वरती हुई. हिकिड़े भेरे हिकिड़ी बुढिड़ी अम्मां खे छिकी पैजी वयी हुई. डाढी हसरत सां हूअ शाम जो साठु कराइण आई हुई पर, बाबाजनि पाण बुढापे जे करे खट तां उथण खां हलाखु हुआ. हाणे छा कजे. अम्मां थोरी मायूस थी वई. केडी मुश्किल सां त हूअ हिते पहुती हुई. बाबाजनि कुझु सोचे मूंखे सडु कयो ऐं मुंहिंजी पुट्ठी ठपुरे मूंखे अम्मां जो साठु करण लाइ चयाऊं. मां वाइड़ी थी वियसि, जणु सोचियां पई त इहो कीअं थींदो. बाबाजनि समिझी विया. चयाऊं, "वञु पुट, भगवानु तोखे कामयाबी डींदो.'' अम्मां खे बि पहिरीं त मूंखां साठु कराइण में कुझु हबक पई थिये पर, बाबाजनि जो हुकुम हो, सो त मञिणो ई हुओ. लाचारु साठु करायाईं ऐं मथाछिरी आसीस डई हली वई पर, हुनजी आसीस रंगु लातो. सुबुह् थींदे ई सभिनी जे वात में हिकिड़ी ई गाल्हि हुई त ''बेली साठ वारे काके जी नुंहुं निर्मला त वाह जो साठु थी करे. मां त जणु मुई पई हुअसि, मूंखे नौबनो करे छडियो अथाईं.'' बाबाजनि शाइदि इहा गाल्हि बुधण लाइ भीष्म पितामह वांगुरु साहु रोके वेठा हुआ. तहिंखां पोइ नका कयाऊं हम, नका कयाऊं तम, रमंदा रहिया, अलबत्त इहा डात मूंखे डई विया. इहा आहे मूंखे डात मिलण जी थोरे में कहाणी.'' मूंखे बुधी अजबु कीन लगो जो अहिड़ियूं अजब-गज़ब कहाणियूं ऐं किस्सा मूं अगि में बि घणई बुधा-पढ़िया हुआ.
                 चवंदा आहिनि त चोवीह कलाकनि में हिक भेरो ज़बान ते सरस्वती विराजमान हूंदी आहे. जडंहिं श्री कृष्ण
भगवान खे ज़हर वारी थञु पियारण जे इरादे सां पूतना माई आयी हुई त भले ई कपटु करे चयाईं त मुंहिंजी थञु में अम्ब्रितु आहे. बालक खे धाराईंदसि त हू अमरु थी वेंदो, उहा गाल्हि सचु थी वई. श्री कृष्णु त अमर थी वियो, हा पूतना माई भले ई सुर्गवासी थी वई. शाइदि उन वक्ति हुनजी ज़बान ते बि सरस्वती विराजमान हुई. जडंहिं मूं भावन मां खा हीउ सुवालु पुछो हो तडंहिं बि शाइदि मुंहिंजी ज़बान ते बि सरस्वतीअ जो वासो हो, जो अजु हिक वडे अर्से खां पोइ, जडंहिं कि हुनजा वंशज बि शाइदि हुनखे विसारे चुका हुजनि, मां हुनते आखाणी लिखी रही आहियां.
                 जीअं-जीअं भावन मां जे साठ जी शफ़ा जी नामूश वधंदी रही तीअं-तीअं भावन मां जी निविड़त वधंदी रही. के-के त इंएं बि चवण लगा त भावन मां जे हथ में त डाढी घणी शफ़ा आहे. शाइदि बाबाजनि खां बि वधीक. निविड़त ऐं निहठाईअ में हूअ पंहिंजो माटु पाण हुई. असीं स्कूल में बि कंहिंसां गाल्हि कंदा हुआसीं त असांजा सहपाठी ऐं पाड़े में रहंदड़ पंजाबी वगैरह बि हुन वटि वेंदा हुआ त खेनि बि तमाम सुठो आज़मूदो थींदो हो ऐं हू बि भावन मां गुण गाईंदा ईंदा हुआ. 
                      हिकिड़े डींहुं सुबुह जो असीं निंड मां उथियासीं त घर में खुसपुस पिये थी त "भावन मां
खे भगवान पाण वटि घुराए वरितो.'' असां समिझियो "शाइदि भगवान जो साठु करण वई हूंदी, जल्दु ई अची वेंदी''. पर, पोइ पतो पियो त भावन मां हिन फ़ानी दुनिया मां चालाणो करे वई आ ऐं हाणे कडंहिं बि वापसि कोन अची सघंदी. पंहिंजी मस्तीअ में मस्त रहण वारा असीं बार वडनि जे मना करण ते बि भावन मां जे अंतिम दर्शननि लाइ वञण खां पाण खे न रोके सघियासीं ऐं हिक-बिए खां पुछण लगासीं त हाणे असांजो साठु केरु कंदो?
                       -----------------------------------