हरिको पंहिंजो आहे (2009 - Sindhi)

Introduction     Cover     Pictures     Media Coverage     Sample Poems     Ordering Information

Introduction - परिचय

सिंधी अकादमी, दिल्लीअ जे पारां 19.12.09 ते दिल्ली हाट, पीतमपुरा में आयोजित "सिंधी लोक ऐं विरासत उत्सव" जो सुहिणो मौको हो। दिल्लीअ जे कुंड-कुड़िछ मां आयल सिंधी सिंधियत जे हिन उत्सव में सिंधी कलाकारनि ऐं कवियुनि जे फ़न जो आनंदु माणे रहिया हुआ। हिन उत्सव में कवि सम्मेलन जो आयोजन पिणि कयलु हो। सिंधी अकादमीअ जे उपाध्यक्ष श्री मुरलीधर जैतलीअ जी सदारत में थियल कवि सम्मेलन में श्री लखमी चंद टेवाणीअ पंहिंजी कविता 'खुशहाली माणियूं' में ग्लोबल वार्मिंग लाइ जागरुकता डेखारींदे इको फ्रेंडली पर्यावरण ठाहिण लाइ सावाणि वधाइण जो आह्वानु कयो. कवि सम्मेलन जे आखिर में श्री लखमी चंद टेवाणीअ जे कविता ऐं गीत संग्रह 'हरिको पंहिंजो आहे' जो लोकार्पण थियो। विमोचन सिंधी अकादमीअ जे उपाध्यक्ष श्री मुरलीधर जैतलीअ जे मुबारक हथनि सां थियो, जिनिजे बेशकीमती सुझावनि सां हीउ संग्रह सींगारियलु पिणि आहे। हीउ किताबु सिंधी अकादमी, दिल्लीअ जी आंशिक अर्थिक सहायता सां प्रकाशित थियलु आहे।

सभिनी खां पहिरीं त किताब जो टाइटिल पेज पाण डांहुं ध्यानु आकर्षित थो करे। सावाणि वधाइण जो आह्वानु करण वारे कविअ खे कुदरती साओ रंगु पसंद आहे। तंहिंकरे खूबसूरत साए बैकग्राउंड में अनेक रंगनि जा गुल किताब जे उन्वान 'हरिको पंहिंजो आहे' खे सार्थक थो करे।

हिन संग्रह में ज़िदगीअ जा अनेक पहलू, गुरु-महिमा, ईश-वन्दना, संस्मरण, चेटी, चंडु, कुझु डिण, समाज जी कुरीतियुनि ते चोट, प्रकृति-चित्रण, प्रदूषण हटाए इको फ्रेंडली पर्यावरण ठाहिण जी ख़्वाहिश, सिंधी-सिंधु ऐं सिंधियत,हास्य-व्यंग्य, सामाजिक चेतना, देशभक्ति वगैरह विषयनि ते कविता ऐं गीत शामिल आहिनि.

हिन संग्रह जूं अनेक खूबसूरत कविताऊं सिंधी अकादमीअ जी अदबी बैठकुनि जी रौनक वधाए चुकियूं आहिनि. कविअ जे कविता-पाठ जो खूबसूरत अन्दाज़ सभिनी जो ध्यानु छिकींदो रहियो आ। 'हरिको पंहिंजो आहे' कविअ जो पहिरियों संग्रह हूंदे बि कविताउनि जी गहराई कविअ जे ऊन्हें मन जी पहुच ऐं मेहनत जो दिलकश नतीजो आहे.

106 पेजनि जे हिन बेशकीमती संग्रह जी कीमत फ़कति 150/- रु. रखी वेई आहे, जीअं हरिको संग्रह खे सवलाईअ सां वठी सघे। उम्मीद आहे त भाउ टेवाणीअ जे हिन किताब जी आजियां थींदी ऐं संदसि मेहनत कामयाब थींदी।

Cover

Front	Back
Foreword	Information Page

Pictures from the book's release on 19-Dec-2009

 

Media Coverage

Sindhi Gulistan

Hindu

Sample Poems

सच्चा हीरा आहिनि
असीं हुआसीं बार
सभिनी सां दोस्ती ऐं प्यारु
पर, डाडे जा यार,
उन्हारे में रात जो रोटी खाईंदे ई
डाडे सां गडु चढ़ी वेंदा हुआसीं खुड ते
पोइ त थींदी हुई रांद-रूंद ईंदी हुई मौज-बहार
डाडे खे बि नचाइण-टिपाइण लाइ रहंदा हुआसीं
त्यारु आखरि थकिजी वेही रहंदा हुआसीं
डाडे जे चौधारी पोइ हलंदी हुई चुटकुलनि जी महफ़िल
आखाणयुनि जो दौरु हर-हर चवंदा हुआसीं
डाडा हिक बी एक और एक और.
मज़े जी गाल्हि इहा जो हरिका आखाणी
शुरु थींदी हुई हिकु हो राजा
असीं झटपट चवंदा हुआसीं हिक हुई राणी
हिकिड़े डींहुं आखाणी शुरु थियण खां अगई
डई छडियोसीं अल्टीमेटम
डाडा अजु नो राजा नो राणी
ओनली नंढनि बारनि जे
खुशियुनि ऐं ग़म जी कहाणी,
डाडे चुनौती कई कबूल
हुननि जो ख़ज़ानो हो भरपूर
निकिती श्रवणकुमार जी कहाणी
असां चयोसीं मंज़ूर आ हुज़ूर
डाडे श्रवणकुमार जी मातृ-पितृभक्तिअ जी आखाणी बुधाईंदे चयो
श्रवणकुमार कांवड़ में वेठल माउ-पीउ खे
नको बोझु समिझियो नको मजबूरी हुन समिझियो
मुंहिंजी कांवड़ में हिक पासे लछमी विराजमान आ
बिए पासे भगवानु मां आहियां केतिरो न भाग्यवानु
वरी सोचियाईं बालपणे में मां माउ-पीउ जी बांहुंनि जे झूले में झूलियो आहियां
अजु मां उन्हनि खे पंहिंजियुनि बांहुंनि जे झूले में झुलाए रहियो आहियां
डाडे खां बुधल श्रवणकुमार जी आखाणीअ जा दिली उद्गारनि वारा उहे हिस्सा
अजु बि मुंहिंजी ज़िंदगीअ जा बेशकीमती हिस्सा आहिनि
अमोलकु रतन आहिनि
सच्चा हीरा आहिनि,
सच्चा हीरा आहिनि,
सच्चा हीरा आहिनि.
-----------------------------------------------------------------

पंहिंजो मटु शल पाण हुजे
पल-पल मूंखे याद अचे मुंहिंजी प्यारी पार्वती माउ,
उथंदे-विहंदे चवंदी हुई अचु,मिठा मखणु अची खाउ.
नेरनि ते डिए कुटीअ कटोरो,झझी झण जो गिलासु,
केडहां विया उहे डींहड़ा मालिक कोन थो अचई क्यासु?
वई रुक्मिणी रथ ते चढ़ी ज्यां भजन सेखारे,
जय गणेश जी आरती, दया-धर्मु संस्कार सेखारे,
बणिजो सच्चा भारती. लड्डूं मांहिं जा,
हलवो कराची,खोराकुनि जा दबा ठहनि,
घुरी बि खाऊं, लिकी बि खाऊं, मिठिड़ी अमड़ि जा नेण ठरनि.
थञु में सिंधु जो प्यारु पियारियो, सुती पियारी सिंधीअ जी,
ए बी सी डी मूंखे सेखारी, पीड़ पक्की कई हिंदीअ जी.
मुंहिंजी सार-संभाल में पंहिंजो ध्यानु भला हूअ कीअं रखे?
हरदम तार इहाई मुंहिंजो पुटड़ो कडंहिं ही टोलु चखे.
अचे न मूंडे वाउ ततो शल करे वेनती दाता खे,
पुटिड़े जा सभु कष्ट कटिजि प्रभु भली डिजांइं तूं माता खे.
जिते हुजे आसीसा माउ जी, हरदम मूसां साणु हुजे,
माउ जी ममता, माउ जी छाया, पंहिंजो मटु शल पाण हुजे.
-----------------------------------------------------------------

हिकु भेरो हली आउ
हली अचु प्यारी भेणु नानकी
हिकु भेरो हली आउ
वाट निहारिनि नेण निमाणा
हिकु भेरो हली आउ-
रक्षा-बंधन जो डींहुं प्यारो
भाउ-भेण जे प्रेम जो सुहिणो नज़ारो
भाउरनि जे मस्तक ते शुभ तिलकु,
हथनि में प्यार भरी रखिड़ी
मुंहिंजे मन ऐं अखियुनि जो सूनो सितारो
भेणु आ त रक्षा-बंधनु लगे सूंहारो
हिकु भेरो हली आउ
हली अचु प्यारी भेणु नानकी
हिकु भेरो हली आउ
वाट निहारिनि नेण निमाणा
हिकु भेरो हली आउ-
डियारीअ जूं खुशियूं, मस्तियूं ऐं माण्हुनि जा रेला
भाई दूज जो प्यारो डींहुं, मौजुनि जा मेला
भाउ खे तिलकु हणी वातु मिठो कराए
दुआऊं डियण-वठण जा उहे पल अलबेला
भेणु आ त भाई दूज मौज मचाए
हिकु भेरो हली आउ
हली अचु प्यारी भेणु नानकी
हिकु भेरो हली आउ
वाट निहारिनि नेण निमाणा
हिकु भेरो हली आउ-
नानक जी भेणु नानकी नानकु-नानकु पुकारींदी रही
तडंहिं नानकु महान संत गुरु नानकु थी सघियो
मूंखे नानकी-नानकी पुकारींदे केतिरो अरसो गुज़िरी वियो
पर तूं न आईंअं नेण निहारींदा रहिया, लुढ़िक वहाईंदा रहिया
हिकु भेरो मिलीं त समुझां, मुंहिंजो अर्ज़ु अघाइजी वियो
जिनखे भेनरु कोन्हंनि उन्हंनि जो दर्दु कीअं समुझे बियो को
मुंहिंजो अर्ज़ु अघाइण लाइ
हिकु भेरो हली आउ
हली अचु प्यारी भेणु नानकी
हिकु भेरो हली आउ
वाट निहारिनि नेण निमाणा
हिकु भेरो हली आउ-
शादियुनि-मुरादियुनि जा मिठिड़ा डींहड़ा
दोस्तनि, रिश्तेदरनि ऐं पाड़ेवारनि जा मथाछिरा मींहड़ा
साठनि-सुगिणनि महिल ओधरि जो ऐनरु-ऐनिरियाणी
मनु गोल्हे भेनड़ीअ जा सच्चा नींहड़ा
सच्चे नींहं जो दरशनु कराइण
हिकु भेरो हली आउ
हली अचु प्यारी भेणु नानकी
हिकु भेरो हली आउ
वाट निहारिनि नेण निमाणा
हिकु भेरो हली आउ-
-----------------------------------------------------------------

हरिको पंहिंजो आहे
असीं
अक्सर सोचींदा आहियूं
त
हिन फानी दुनिया में
केरु कंहिंजो नाहे
तंहिंकरे
असीं
कंहिं नंईं चीज़ ते
घटि गौरु कंदा आहियूं
कंहिं अजनबीअ खे डिसी
मुशिकण में बि / कीबाईंदा आहियूं
कंहिं नंईं राह ते
वञण खां अगु
सौ भेरा सोचींदा आहियूं
ऐं
कंहिं नंएं कम में
शिरकत करण खां
डिजंदा-कंबंदा आहियूं
इन्हींअ करे / असांजे
बल / बुद्धि /विद्या / ज्ञान / ऐं
प्रेम जो दायरो
सीमित थी वेंदो आहे
असांजे मथां
सुवारु थी वेंदा आहिनि
कावड़ि / नफरत / अणजाणाई
ऐं अकेलाई
पर,
जडंहिं असीं
पंहिंजे सोच-वीचार खे
थोरो नंओं मोड़ु दई
सोचींदा आहियूं
त / असांखे महसूस थींदो आहे
त / हिन खूबसूरत दुनिया में
हरिको पंहिंजो आहे
पोइ / लगंदो आहे / त
हरिका नंईं चीज़
असांजे आनंद में
इज़ाफ़ो थी करे
कंहिं अजनबीअ सां
मुशिकी गडिजण करे
असांजे चेहरे जी रौनक
वधियल थी लगे
कंहिं नंईं राह ते
हलण सां
घणई नवां रस्ता
मिली पवंदा आहिनि
कंहिं नंएं कम में
उमंग-उत्साह सां
शिरकत करण करे
अपार खुशियूं मिली पवनि
औखी वेल ते
कंहिंजे कमि अचण ते
रूहानी खुशी हासिल थी वञे
पोइ
इंएं छो सोचियूं
त
केरु कंहिंजो नाहे
छोन इंएं सोचियूं
त
हरिको पंहिंजो आहे,
हरिको पंहिंजो आहे,
हरिको पंहिंजो आहे.
-----------------------------------------------------------------

Ordering Information
Please contact on tewani30@yahoo.co.in for ordering copies of the book. Prices are as below.
Delivery to India : Rs. 150 + Postage & Handling
Delivery to Australia : AUD 6.99 + Postage & Handling
Delivery to U.S.A. and rest of the world : USD 6.99 + Postage & Handling