मुंहिंजे घर में सीरो ठहंदो आ

मुंहिंजे घर में सीरो ठहंदो आ
सिन्धी कविता-लेखक लखमीचंद टेवाणी

भारत जी राजधानी दिल्ली
दिल्लीअ जो शानु डक्खिणी दिल्ली
उते मुंहिंजो ठिकानो आ
पर पाणीअ भरायो जानो आ
सालि-बी-सालि मुंहिंजो भागु भलारो थींदो आ
ऐम.सी.डीअ जे नल में पाणी ईंदो आ
उहो डींहुं सभागो लगंदो आ,
मुंहिंजे घर में सीरो ठहंदो आ.

बिजलीअ जी छा गाल्हि बुधायां
कंहिंजा-कंहिंजा गुण मां गायां
लिखण विहां त बिजली गुल
लगे थो आहे सभु कुझु ढुलमुल
कहिं-कहिं डींहुं बिजलीअ जी कृपा थींदी आ
मुंहिंजे चपनि ते सुर्खी ईंदी आ
उहो डींहुं सभागो लगंदो आ,
मुंहिंजे घर में सीरो ठहंदो आ.

सड़कुनि जी आ अजब कहाणी
सड़क वेचारी आ वेगाणी
कल्ह हिन खोटी अजु हुन खोटी
अञा ठही मस त वरी बिए कंहिं खोटी
कडहिं-कडहिं सड़क आ सिधी-संवाटी
नको किथे जबलु नको किथे घाटी
उहो डींहुं सभागो लगंदो आ,
मुंहिंजे घर में सीरो ठहंदो आ.

मां सुबुह जो अख़बार पढ़ंदो आहियां
पढ़ंण खां वधीक कुढ़ंदो आहियां
पीउ धीउ सां मुहुं कारो कयो
भाउ भेणु ते ई वारो कयो
चाचे भाइटीअ खे कीन छडियो
मतलबु त को वणंदड़ु समाचारु कीन मिलियो
कडहिं-कडहिं का ख़बर मन मोहींदड़ हूंदी आ
अख़बार पढ़ी लबनि ते मुर्की ईंदी आ
उहो डींहुं सभागो लगंदो आ,
मुंहिंजे घर में सीरो ठहंदो आ.

लगे थो खुशीअ लाइ सिकंदे-सिकंदे हयाती गुज़िरी
प्यासी नज़र प्यासी ई रहिजी वेंदी
पैसा खर्चे बि मिलनि था ठला
वाइदा नको किथे सहूलियत नको काइदा
तमन्ना आहे त मां खुशि थी खिलंदो रहां
वर-वर डई इएं चवंदो रहां
हर डींहुं सभागो लगंदो आ,
मुंहिंजे घर में सीरो ठहंदो आ.