साईंअ जो आशीर्वादु – संस्मरण – लखमीचंद टेवाणी
पंजें क्लास में मां पहिरिएं डींहुं हाई स्कूल में वियुसि त हिकु सुपनो सजाए वियो होसि. चोथें ताईं प्राईमरी स्कूल में असांखे हिक ई मास्तरयाणी सजो डींहुं पाढ़ींदी हुई. मास्तरयाणी त सुठी हुई, मूंखे प्यारु बि डाढो कंदी हुई, पर, मुंहिंजा वडा दोस्त बुधाईंदा हुआ त उन्हंनि खे हर पीरिअड में नंओं मास्तरु या मास्तरयाणी पाढ़ींदा आहिनि, उहो बुधी डाढी खुशी थींदी हुई. हाणे जडंहिं मां हाई स्कूल में आयुसि त इहो सोचे आयो होसि त हर पीरिअड में नंओं मास्तरु, नंओं विषय, नंवां वीचार, नंयूं-नंयूं गाल्हियूं मिलंदियूं. प्रार्थना-सभा में साम्हूं बीठल मास्तरनि खे डिसी दिल टिप्पा डियण लगी. हिननि मां घणई मास्तर मूंखे पाढ़ींदा, इहो सोचे मनु मौज में हो.
उन्हनि मास्तरनि मां हिकु मास्तरु हो डिघो-सन्हो, गोल चेहरो, ठाहूके चकाचक कपड़नि वारो, तरतीब सां वारनि जूं पटियूं ठहियल. मतलबु त लगे पियो पंहिंजी शख़्सियत खे निखारण लाइ खासी मेहनत करण वारो हो. ताज़ो-तवानो लगंदड़ हुन मास्तर खे डिसी दिल चयो, "जे हीउ मास्तरु असांखे गणित पाढ़े त कहिड़ो न सुठो! गणित मुंहिंजो पसंदीदा विषय हो ऐं नंढे हूंदे खां वठी मां डाढे शौंक सां पढ़ंदो होसि. थोरी देर में हैडमास्तर साहिब सभिनी मास्तरनि जो परिचय करायो. मूंखे डाढी खुशी थी त जंहिं मास्तर खां मां पढ़णु थे चाहियो हो सो गणित विषय जो ई हो.
क्लास में वियासीं. टाइमटेबिल मिलयो. टाइमटेबिल में गणित लाइ उन्हें ई मास्तर जो नालो डिसी मुंहिंजी खुशीअ जो ठिकानो न रहियो. मूं भगवान खे धन्यवाद डींदे पहिरीं खां बि वधीक रुचिअ सां गणित पढ़णु शुरु कयो. गणित जे साईंअ जे बारे में जेको वीचारु मूं मन में ठाहियो हो, साईं सचुपचु उहड़ो ई बल्कि उन्हें खां बि वधीक सुठो ऐं मेहनती निकितो. हिकु-हिकु सुवालु इंएं समझाईंदो हो जो दिल में घरु करे वेंदो हो. अजु ताईं जणु त साईंअ जा अखर दिल ते छपियल आहिनि.
अजु बि इंएं समिझियो वेंदो आ त गणित जो मास्तरु माना पैसो-ई-पैसो, कमाई-ई-कमाई. डिसंदा बि हुआसीं त गणित जो मास्तरु कडंहिं बि खाली न विहंदो हो. स्कूल खां अगु ट्यूशन, स्कूल खां पोइ ट्यूशन, घर में ट्यूशन, बाहिरि ट्यूशन, अकेलाईअ में ट्यूशन, ग्रुप में ट्यूशन, सुबुह जो ट्यूशन, शाम जो ट्यूशन. असांजे साईंअ खे बि घणई माण्हूं ट्यूशन लाइ चवंदा हुआ, साईंअ जो जवाबु हूंदो हो, "मां क्लास में ई एतिरो जी-जान लगाए पाढ़ींदो आहियां जो सिखण वारो उते ई सिखी वेंदो. ट्यूशन जी कहिड़ी ज़रूरत?''
असांजो हिकु सहपाठी, जेको ताज़ो-ताज़ो दिल्लीअ में बाहिरां आयलु हुओ, उहो गणित में तमाम कमज़ोर हूंदो दो. उन्हेंजे पीउ जे घणे ज़ोर भरण ते साईंअ हुनखे ट्यूशन डियणु कबूल कयो. जडंहिं इम्तिहान थियण वारा हुआ त बार साईंअ खे खास-खास सुवाल बुधाइण लाइ चयो. साईंअ जो सिधो जवाबु हो, "मां जेकी क्लास में बुधाईंदो आहियां, ध्यान सां बुधंदो करि. हिते रुगो पढ़ाईअ जी गाल्हि थींदी, बियो कुझु न.'' ईमानदारी, सच्चाई ऐं शागिर्द जी बेहतरी सोचण जो इन्हें खां सुठो मिसाल कहिड़ो मिलंदो?
हिकिड़े भेरे असीं स्कूल जे पारां पिकनिक ते वियासीं. जंहिं बस में असीं वेठा हुआसीं उन्हींअ बस जो इंचार्ज असांजो गणित जो साईं हो. मां मन-ई-मन में खुश बि हुउसि, जो साईंअ जे एतिरो वेझो अचण जो सोनहरी मौको जो मिली रहियो हो पर, थोरो-थोरो डपु बि पियो लगे त हमेशा गंभीर रहण वारे साईंअ जे हूंदे छा असीं पिकनिक जो पूरो मज़ो माणे बि सघंदासीं या न. पर, जडंहिं साईंअ जी बहुमुखी शख़्सियत जो बियो पहलू डिठोसीं त मज़ो ई अची वियो. साईंजनि असांखे बस में न रुगो गाइण- वजाइण जी इजाज़त डिनी, असांसां गाइण-वजाइण में पाण बि शामिल थिया. अंताक्षरीअ में त साईंअ जो जवाबु ई कोन हो. लोदीगार्डन में रोटी खाइण महिल त जणु हुननि खे याद ई कोन हो त हू मास्तर साहिब आहिनि ऐं असीं संदनि शागिर्द. रोटी खाइण खां पोइ साईंजनि हिकिड़ो मिठाईअ जो दबो खोलियो जंहिंमें घर जो ठहियलु लज़ीज़ मोहनथालु हो. साईंजनि पंहिंजे हथ सां डाढे प्रेम सां मोहनथालु विराहियो. अहिड़े लज़ीज़ ऐं प्रेम भरियल मिठाई जो सवादु जणु त हींअर बि वात में आहे. असीं डाढो खुश हुआसीं. उहा पिकनिक ऐं साईंजनि जो निर्मलु प्यारु अजु बि नथो विसिरे.
साईंजनि जो हिकिड़ो बियो रूपु बि विसिरण जहिड़ो कोन्हें. असांजे स्कूल जो सालानो जलसो थी रहियो हो. साईंजनि खे हिकिड़ो अंग्रेज़ी नंढो नाटकु तयार करण लाइ चयो वियो हो. साईंजनि नाटकु तयारु करायो. साईंजनि जी नाटक जे बारे में जानकारी डिसी त असीं हैरान थी वियासीं. हिक-हिक कलाकार जी नंढी-नंढी गाल्हि ते हुननि जी पूरी नज़र हुई. हुननि हिकिड़ो बियो सुठो कमु कयो हो जो हरकंहिं कलाकार खे बिनि-बिनि जणनि जो पार्टु याद कराए छडियाऊं, जीअं ऐन टाइम/मौके ते को कलाकारु कंहिं सबब न अची सघे त डुखियाई न थिये. मूंखे सभिनी कलाकारनि जो पार्टु तरतीबवार याद हो, तंहिंकरे मुंहिंजे लाइ बिनि-टिनि ड्रेसुनि जो इंतज़ामु कयो वियो हो जीअं त ओडी महिल का रंडक न अची सघे. साईंजनि जी महिनत साबि पई. नाटकु तमाम चङीअ तरह थियो ऐं डाढो पसंद कयो वियो. पछाड़ीअ जो साईंजनि हिक-हिक बार खे कंहिं-न-कंहिं सां गडु घर मोकिलण जो इन्तज़ाम कयो. बिये डींहुं सभिनी खे हाल में घुराए हाज़री वरिती ऐं नाटक जी कामयाबीअ लाइ धन्यवाद डिनो ऐं पंहिंजे तरफां इनामु बि डिनो.
साईंजनि जो ज़िक्रु निकितो आ त मूंखे हिकु बियो वाकयो बि थो याद अचे. हिकिड़े भेरे असांजो इंटर स्कूल क्रिकेट मैच थियणो हुओ. असांजो पी.टी.आई. डाढो काबिल ऐं मेहनती मास्तरु हूंदो हो. उन्हें जी
मेहनत ऐं काबिलियत सां असां घणई मैच खटी चुका हुआसीं. मैच खां कुझु डींहं अगु हुन खे मोकल
वठिणी पई. असांखे ख़बर पाई त असांजा ढढर ढरा थी विया .कंहिं सुठे कोच जी रहनुमाईअ में प्रैक्टिस
करण खं सवाइ मैच खटणु मुश्किल ई न नामुमकिन हो. अहिड़ी मुश्किल घड़ीअ में कोच जे रूप में असांजो
गणित जो साईं असां लाइ वरदान जे रूप में साम्हूं आयो. पहिरीं त असां समिझियो त गणित जे साईंअ खे
असांजो कोचु ठाहियो वियो आ, अलाए जे छा नतीजो निकिरंदो पर, जीअं-जीअं साईंजनि असांखे क्रिकेट जा
टिप्स डींदा रहिया ऐं असांजी हौसला-अफ़ज़ाई कंदा रहिया, असांजे मन में हुननि लाइ हिक ख़ास जगह ठहंदी
वई. मैच वारे डींहुं असांखां वधीक जोशु साईंजनि जो डिसी असांजे जोश में इज़ाफ़ो थी वियो.ऐं नतीजे में मिली
असांखे कामयाबी, सर्टिफिकेट ऐं घणई इनाम. बिए डींहुं प्रार्थना सभा में हैड्मास्तर साहिब असांजी कामयाबीअ
ते असांखे वाधायूं डींदे असांजी तारीफ़ कई पर, उन्हें खां बि वधीक साईंजनि जे गणित जो मास्तरु हूंदे बि
क्रिकेट ते एडी जानकारी ऐं पकड़ जी घणी तारीफ़ कई. हूंअं त असांजी टीम सुठी हुई पर, असांजे पी.टी.आईअ
जी गैरमौजूदगीअ में हुन मैच जी कामयाबी त फ़कति साईंजनि जे करे मिली हुई. असांजी खुशीअ जो
त ठिकानो ई कोन हुओ. असां खुशीअ विचां साईंजनि खे पेरे पियासीं, साईंजनि प्यार विचां असांखे
आशीर्वादु डई गले लगायो. प्यार जी उहा गर्माइश हाणे बि महसूस थी रही आहे.
डींहं ऐं महिना मटिजी साल थिया. टिनि सालनि खां पोइ अठें क्लास में वरी उहोई मास्तरु गणित पढ़ाइण लगो. हिकिड़े डींहु साईं वज़न ऐं मिकदार (weight & volume) जो सुवालु सेखारे रहियो हो. साईंअ बोर्ड ते हिक काठ जी पेतीअ जी ड्राइंग कढी ऐं चयाईं त हिनजो जेको वज़नु आहे, सो रुगो काठ जो आहे. इनते मूं चयो, "न साईं, जींअं त हवा हरकंहिं हंधि हूंदी आहे, इनकरे एतिरे मिकदार जे हवा जो बि वज़नु हिन में शामिल आहे.'' साईं जणु त वाइड़ो थी वियो ऐं ज़ोर सां पुछंईं त हीउ कंहिं चयो? साईं कडंहिं बि ज़ोर सां कोन गाल्हांईंदो हो, इनकरे असां सभु सक़ते में अची वियासीं. मूं हथु मथे खणी चयो, "साईं मूं चयो.'' साईंअ मूंखे पाण वटि सडु करे डाढो प्यारु कयो ऐं मूंखे चयो, "शाबास पुट, ठीकु आहे. पर, हिन किस्म जे सुवालनि में असां हवा जो वज़नु नज़रअन्दाज़ कन्दासीं, छो जो उहो तमाम थोरो, न जे बराबर हूंदो आहे. बहरहाल, मुंहिंजो आशीर्वादु आहे त तूं साइंस में घणी तरक्की कंदें. '' साईंअ जा इहे अखर मुंहिंजे नंढिड़े मन लाइ जणु वडी ताकत हुआ. साईंअ जे वचननि खे सही करण लाइ मूं बियनि विषयनि सां गडु-गडु साइंस ऐं गणित में बि चङी मेहनत कई. अगिते हली साइंस खंईं, बी.एस.सी करे एम.ए. गणित में कई ऐं साइंस ऐं गणित में घणई इनाम ऐं डिस्टिंक्शनस पिणि हासिल कया. उन्हंनि इनामनि ऐं सर्टिफिकेटस खे डिसी मूंखे लगंदो आहे त उन्हंनि में साईंअ जो आशीर्वादु समायलु आहे.
No comments:
Post a Comment